ჭიაკოკონობა — უძველესი ქართული რიტუალი — ცეცხლით განწმენდის დღეობა, რომელიც დამყარებულია უძველეს წარმოდგენაზე ცეცხლის, როგორც ავი სულების საწინააღმდეგო და ყოველგვარი უწმინდურებისაგან განმწმენდ ძალაზე.
ჭიაკოკონობა სხვადასხვა ხალხში წელიწადის სხვადასხვა დღეს აღინიშნებოდა: ყველიერის ორშაბათს, დიდმარხვის პირველი ან უკანასკნელი კვირის შაბათს, ივანობას და ა.შ.
საქართველოში ჭიაკოკონობა დიდ ხუთშაბათს ან დიდი ხუთშაბათის წინასაღამოს იცოდნენ. ეზოში კოცონს გააჩაღებდნენ, ახალგაზრდები ცეცხლის გარშემო დარბოდნენ, ცეკვავდნენ, ზედ ახტებოდნენ და გაიძახოდნენ „არული კუდიანებსაო“.
გადმოცემის თანახმად, კოცონზე გადახტომის დროს ადამიანი ავი სულებისგან იწმინდება. ჭიაკოკონას ანთება და მასზე გადახტომა ძირითადად იმის საწინდარი იყო, რომ კუდიანები ვერავის ავნებდნენ და დილაც მშვიდობიანად გათენდებოდა. კუდიანების, ავი სულების დასაფრთხობად და განსადევნად ისროდნენ თოფებს. ხალხის წარმოდგენით კუდიანები ამ ან მომდევნო ღამეს გარკვეულ ადგილას იკრიბებოდნენ და ზეიმს მართავდნენ. მსგავსი ჩვეულება გავრცელებული იყო საქართველოს თითქმის ყველა კუთხეში. ხევსურეთში ჭიაკოკონობას „კუდიან წუხრას“ უწოდებდნენ, რაც აშკარად მიუთითებს ამ დღეობის უშუალო კავშირზე ბოროტ ძალებთან.
მას გურიაში „ფაკლობას“ ეძახდნენ, ქართლსა და იმერეთში ჭიაკოკონობას. მესხეთ-ჯავახეთში ჭიაკოკონობა წითელ პარასკევს იცოდნენ. სამეგრელოში ჭიაკოკონა 15/28 აგვისტოს, ღამე იმართებოდა. „ჭიაკოკონა“/ჭიაკოკოლა სულხან-საბა ორბელიანის განმარტებით, ჩალით დანთებულ დიდ ცეცხლს ნიშნავს.
90-იანი წლებისა და 2000-იანის დასაწყისში ჭიაკოკონობა დიდი პოპულარობით სარგებლობდა. ამ დღეს ბავშვები დიდი სიხარულით ელოდნენ და რამდენიმე დღით ადრე, საგანგებოდ აგროვებდნენ ხის ნარჩენებს, ძველ საბურავებს და საღამოს, ერთი სიამოვნება იყო დიდი ცეცხლის ანთება და სამეზობლოს ერთად შეკრება, თუმცა, ბოლო წლებში ეს ტრადიცია ნელნელა მივიწყებას ეძლევა და იშვიათად თუ ნახავთ ამ დღის აღნიშვნას.
გარდა ამისა, აიკრძალა საბურავების დაწვა, შესაბამისად, ინტერესმაც ნელნელა იკლო.
წესით, ჭიაკოკონობა დღეს, 16 აპრილს არის, თუმცა, დიდი ალბათობით, მას აღარავინ აღნიშნავს.
გიორგი ლაღიძე არის ვებ გამოცემების Multimedia.ge-ს და Multinews.ge-ს დამფუძნებელი და მთავარი რედაქტორი
